بارك الله بطلاق=فكني من شور ماق
فكني من شايعه=يتسن ظهر وساق
ما فكني منها صديق=الا ثلاث بطلاق
وامرها ومرها=يومين والشقة شقاق
وسويها ما ينبلع=لو كان من زار العراق
تودع لنا الخبزه=عجين ثلث وثلثين حراق
واهمري اللي قد غدا=ما ذقت لذات الفراق
حلفت أنا فيها ما عيد=واللي سمك سبع الطباق
وصدر مثل باب الجريد=ما قد غطى بشباق
الى نظرت عيونها=فارقت لذات المذاق
الورك ما ورد الحقب=طويله هوفا متاق
وعلى قلها هي وشبه لها=قل سود الجوازي طول العناق
ليتها جوزة للعدو تشغله=عن نويه ومن ذا بحوزه معاق
بالعون منيف قاله لي=يقول غلاك يوم انت صبي
وكذبت منيف في قوله=وتبين لي ما كان غبي
ترى الشايب عند عياله=وام عياله مثل العزبي
كلوا فييده وعافوه=عقب التمسك بسببي
لو يطلبهم ردة لقمه=قالوا محلي وش ذا الصلبي
احفظ مالك تجي غالي=حتى يلاقونك بالعتبي
حتى ام عيالي زهدت بي=نسيت جميلي وطربي
منول تقول لي لبيه=وهالحين تقول لي وش تبي
فقدت مني شي ما يطرا=على بهومي ومر على ركبي
لو هو يشرا كان اشريه=وارخص به مالي وذهبي
وراسي وعظامي توجعني=وظهيري من حد حقبي
وهجوسي تسري بالليل=خوف من موت بطلبي
صدرت وطويت العده=ويعقبني من كان يبي
الدنيا عامرها دامر=ما فيها خير يا عربي
