لاح المشيب وبان في عرضائي=ونعيت من بعد المشيب صبائي
ونعيت خل كان في ماضي مضى=لاحت عليه بوارح الجوزاء
ولي مرة جهالتها علي كبيرة=تحسبني اخرج من نقا الدهناء
تقول حط وقط والا ففارق=مالي بشوف الشيبة الشمطاء
قلت أيها الشوق الذي من قبل ذا=مهوب شره يوم عصر اصبائي
واليوم خالفت الطبوع وكثرني=منك الكلام زادت البغضاء
هو ذا طمع بي فهاك دراهم=وان كان بغض ما لقيت دوائي
البغض نفس ما تطيب على الرضا=وحش جفول فاتني الفرقاء
ذي عادة حب المحب وعاده=ما قط ارافق صاحب البغضاء
وان كان تبغين قط همات الصبا=تراي عنها قد طويت رشائي
وان كان هو بغض او صيدك طامح=فخذي ثلاث واضربي البيداء
قلت دنانيري وعدت بهمه=جذت حبالي عن جمام الماء
العام انا لي كدة ماشومه=هبت عليها البارح اليمناء
اسلفت بها يومين هم جذبت=عنها المصير الى أنها بيضاء
وادلجت راسي مرتين توجد=وصفقت بالوسطى على الطرفاء
وركبت من عالي النشيد بكاعب=غراء تشادي السابق الخضراء
حيرانة الدملوج غامضة الحشا=ما مسها خبث ولا سقواء
مصرية الأطراف ناعمة الصبا=قامت بردف كنها عجزاء
هركولة ياما اتلفت من جاهل=حقت على ديرانها الأنواء
سكنت قصور الوشم شرقي النقا=ما لاوزت من بارح الجوزاء
وانذرتها عن شيخ قوم ناقص=ترثة حضور شذ من حواء
ما شاخ جده قبل ابوه ولا لهم=حق ولا عدوا من القدماء
امسى يسيد بدار حي قد غدوا=يشبه الثور خار في قصباء
يممتها لابن نحيط كساب الثنا=ورث الشيوخ من أول النياء
ولد الحديثي الذي من لابته=ترثة تميم وفرعة العلياء
يا ابن نحيط الله لي من عيلة=خليتهم في الوشم في رجوائي
يرجوني وانا ارتجي من خير=والفضل من ندواك في يمنائي
وصلوا على خير البرايا محمد=ما ناض برق بليلة الظلماء
لقيت انا بالناس عي جاهل=ما الحق والقادي بنص مراده
يجي امور ما يعرف قياسها=ويدق دق عوشز الجراده
ومن لا يصير بقدر نفسه عارف=هذاك ثور ما عليه قلاده
وفي الناس من هو للرفيق مخادع=يوهم صديقه بصدق وداده
كنه سراب في نهار لامع=والغش ما غيره لجا بفواده
وبالناس من يكرم الى جا ضايف=وان ضيف يزحر كنه الولاده
من خلقته ما ذاق زاده ضيف=ولو هو ذباب ما وقع في زاده
وبالناس ظفر ما سمع في هوشه=ولو هو حضرها كان شيل شداده
وبالناس من هو يفتخر في نفسه=من غير فعل يفتخر با جداده
مثل غضاة بالضو مشويه=يصبح مورثها يصير رماده
وبالناس من هو يدعي بديانه=متمسك بديانته واوراده
عن الخلايق غافل ويحسن=ياخذ شريطه مثل جاري العاده
عنده لراعي الصاع موس جيد=واللي بلا صاع له المكراده
فاحذر خداع الخاين المتعبد=لو دام ليله والنهار عباده
كم غر فيها من غرير جاهل=حظه لمثله مثل فخ صاده
وبالناس من هو لغوي بلسانه=والا بنانه ما تهم أضداده
يشري اللغا يوذي القريب وجاره=متوذي حتى بحبل جهاده
وبالناس من ينقد على جهل العرب=وهو جهول والجهل معتاده
وبالناس من هو للنوايب يرتكي=يبدي اضيافه بقوت اولاده
وبالناس من يجمع حلال يدفنه=بجمالته وتجارته وكداده
ويفوز به غيره وينقل ازره=يوم الحساب الى هلك ما فاده
