نشا من غرام القيل بالقلب هاجس=وبدولاب فكر للقوافي  معايس
غرايب بيوت مضمنات نفيسه=من انواع در غاليات نفايس
فيا كاتبي قم هات مصقولة بها=ترقص لفكري زاهيات العرايس
قرايض انغام جياد لكنها=فواريز موجات البحور الخرامس
فانا الماهر البطار والشاعر الذي=تطيع القوافي له بليا تلامس
اصفى حليات القوافي من النبا=بشبر طويل للتفانين لامس
صفا لي بها عرف كما اني بنطقها=مهذب المقول فاصح غير خارس
وفكر بمعناها بعيد مرامها=وعصر بها لي من جديد ودارس
ولانيب ارد الراس الا لمن عدا=يجيبه على ماهوب للفهم طامس
فما كل من ينفخ على الكير صانع=ولا كل من يركب على الخيل فارس
وحلو النبا يسقي ظما القلب مثلما=بالامواه يسقى نابت الزرع رايس
الى عاد ما للقلب يوم منادم=فله في غريب القيل خل موانس
ان كان قبل اليوم لي راحة بها=احاد بسفر ناهيات الانافس
حريص على مرقى صعيبات العلا=بهمة شجاع للملاقا معايس
ترى ما بعيني عن مرام العلا عما=الى قل عنها شوف من لا يمارس
لها منزل فوق السماكين نايف=وثان لها في حاير الفكر حابس
وانا لما توكدت الجفا من رفاقتي=ودبت من الدنيا علينا النوامس
تخيرت لي عنهم بالاوطان منزل=وارخصت غاليهم ببيع الدنافس
وسليت نفسي عن هواهم وقربهم=بقربي كرام ما تعرف الدسايس
جفوني وعافوني ونسيوا جمايلي=من القل واوروني وجيه عوابس
وياما وثقت النفس بحبال ودهم=واقنعتها من زادها بالبسابس
امضي بهم سهل ولا بي جفاسه=وباللين ما لي من اخواني مجانس
الى الله ماجور الليالي ومكرها=ومن لا يجنه مدهشات الغوامس
احسب انني درع حصين لحبهم=وزبن لهم من ضيم سود النوامس
فلما عرفت اني على الذل عندهم=وبيطاوعوا حكي الوشاة النوامس
فلا اظن من يصبر على الهون والردى=ذهين ولو زوله للالباس تارس
ومن للغبن يرضى فهو صار كالذي=لسم الافاعي بالتجاريب لاحس
ومن لا يصون النفس عما يدنس=ويازي لثوب مشرف العز لابس
تهاون بقدر كل هيس من الملا=جهار وكل له بالاقدام دايس
الى عاد طير الحر في منزل الحدا=وفيه العقاب امسى له الرخم فارس
وصار الردي يازي على كل طيب=وجارت على صفر السموم الخنافس
اجل عنك ذي دنيا غرور بحلبها=على حالها ذي كل نبه ورايس
فلا يرتجى فيها المشقى مرونه=الى عاد كفه من ثرى المال يابس
وعز الفتى فيما حوى من حطامها=يمينه لو هو من قطام حساحس
دنياك هذي لو لحي تزخرفت=ولو فرشت ديباجها والسنادس
صيور ما تازي ويازي نعيمها=الى حفها حكم الولي طيف ناعس
لي همة من فضل ربي تصدني=عن الزيغ فيها وارتكاب المدانس
وقلبي على الهجران اقسى من الصفا=الى اوحيت قول الضيق مع كل حافس
هذا نبا من هو من الله يرتجي=جميله وهو من رحمته غير آيس
وصلوا على خير البرايا محمد=عدد ما لعى القمري بحدب الغرايس