امس الضحى دك بي هوجاس=والقلب كنه على مله
كنه يقلب على محماس=فوحه كما فايح الدله
الله يا لولا الحيا يا ناس=لاقول انا بان بي خله
من شوفتي كامل الأجناس=يلعب بسيف الهوى سله
عذب النبا زاهي الالباس=مشيه وزينه على حله
حمر الثمر في الصدر جلاس=مثل الفناجيل مقتله
حدر المليثم ثلاث العاس=وبين الشفايف دوا العله
وان حركت عنقها والراس=شقر عثاكيلها فله
خوفه من السوق والانجاس=ينتل مني وانا اتله
خمسة عشر سنها وقياس=حولين ويسامح الزله