هيض ابن حصيص في تالي نهاره=الف قاف من ضميره مدرجات
يا نديبي فوق منبوذ الفقاره=اركي وحبال كوره كالفات
اركى يرعى نواوير القفارة=ما علاه الشد من عشر سنوات
كن في عينه من الفرقى شراره=او مخاليب الوحوش الطايرات
بندور صاحبي ظبي الزبارة=بو عيون يا حمود مدعجات
جعل ضلع طويق يا عايض وداره=جعل يمحل والوشوم مربعات
حيث ينزل عندنا مظعون ساره=واهتني بصويحبي عشر سنوات
ولعتني بالهوى والحب ساره=ولعتني عن غنادير البنات
ما خبر جار ذبح بالحب جاره=بالمبيسم والثنايا المرهفات
راس ساره ذيل شقر وسط غارة=والجدايل بالرشوش مجدلات
والثنايا قحويان في زبارة=علها الوسمي على حد النبات
ريق ساره مثل شكر في غضارة=او حليب بكار عرب مسمنات
والنهيد زبيدي في دعب قاره=في محير الما القراح مصلعات
والمطوع لو يشوف خديد ساره=ضيع المكتوب وعجل با لصلاة
يا وجودي وجد مكسورالجباره=ساهر تسعين ليله ما يبات
او وجود اللي فضى الحاكم دياره=وخذ ماله والحريم مسلبات
عقب ماهو تاجر راعي عمارة=صار صعلوك علومه هينات
لا يمي يعطي حنيش في خباره=سمها يشظى العظام الصالبات
حالف ما اسلى ولا انسى حب ساره=كود اهل شقرا يخلون الصلاة
لا رماني لا يمين ولا يساره=مار صوبني بحد المرهفات
حطني لا هل الهوى المجمول شارة=مثل نيشان المعاطيب الرماة