اذكر هل الطايف عسى الطايف السيل=عسى السحايب كل يوم تعله
ذكرى الليالي الماضية والتعاليل=عليه دمع العين دايم تهله
ترى الشقا كل العنا والغرابيل=فرقا الحبيب اللي تنكر لخله
عليه دمع العين مثل الهماليل=والى ضواه الليل ياعبرة له
اشكي عليك الحال عسر المداخيل=يخفي دموع العين لاينفطن له
لاعاد لاحيلة ولابه مراسيل=مشكل غرام الحب يامن يحله
بلواك ياراعي العيون المظاليل=اللي خذيت الزين والملح كله

جيناك ياالطايف نبي شوف الاحباب=احد حدر نجد وناس بجده
رجواي بالله من ترجاه ماخاب=والله كريم وسايله ما يرده
راحوا هل الطايف ونور القمر غاب=كل شكى الفرقى ولاهوب وده
وين المصيف وين تلعات الارقاب=عقب الوجود اليوم يا بعد خده
ننشد عن الغالي ونا قف على الباب=وش خانة الطايف الى يبس ورده

زمة نهد والعيون السود=مااقوى العزا يا نظر عيني
زينه يذكر عليه شهود=ياسيد كل المزايين
الله عطاها حمار خدود=ماغير ورد ورياحين
فوق النحر له سواد جعود=ومفرقتها الرمامين
ياليت من ذاق له عنقود=لا جيت عطشان يسقيني
اخاف من شوفة المقرود=والا عدو يباريني

سرى الليل يا ساري وجرحي عرفت دواه=على طلعة الجوزا نبي نسهر الليلة
انا بامسح الجره الى جيت حول حماه=عسى الناس ماتدري وتعرف مداهيله
ترانا على الشكوى ومر الشقا ذقناه=اقوله وانا الشاكي ولا في يدي حيلة
عسى الليل لاحدر وكل عرف مسراه=تناحت نجوم الليل والقلب يسري له
اجي له على الداعي وودى على لاماه=احبه محبة وارخص العمر واضحي له
يحير النظر لاغاب قلت اه وين القاه=تكسر بي العبرات الى ابطت مراسيله
تمشكلت في حبه وشي مضى ماانساه=غرابيل قلبي والشقا من غرابيله
عسى الجو يصفا لي وحبي على مبداه=تطيب الجروح ولذة العمر تكميلة

قم يا حبيبي وروحي نبعد الهم عنا=عطني كلام يوسع خاطري واتمناه
وانت السبب في هواجيسي وما صار منا=مثل الكسير المجبر حيره قل ممشاه
وان جيت انا حول مدهاله خطير معنا=حار الفكر واتفكر وين برقه ومنشاه
واقفيت والدمع من عيني جرى ماتونا=عليك ياللي خذا قلبي وانا اصيح وانخاه
ياناس انا اللي جرحني بالغلا في وطنا=وازريت لااسلي ولاادله في حياتي بلياه
زين الطبايع وغصن فوقه الطير غنى=ريحة زهور سقاها والي العرش من ماه
الله يجيبك وتبعد همنا مع زعلنا=ونفرح بشوفك وكل الذي مضا راح ننساه

قلبي تولع بنجدية=وانا من العام مغديها
واللي ذبحني سعودية=ربي من الزين معطيها
من شافها قال حورية=الزين والملح غاشيها
العين ياعين الادمية=عسكر على الصدر كاسيها
العنق ياعنق ريمية=كن الحمامة  تماشيها

كريم يا بارق سرى=ما احلى رزيم الرعد فيه
يا زين عشبه الى اخضرا=والبل ترعى مفاليه
نطيت انا الحيد الاسمرا=وهيضت انا عبرتي فيه
والبل يا زينة الذرا=كم من غريب توديه
عينت ظبي تحدرا=يرعى الزهر مع مثانيه
جيته مع السطح ما درى=والى القمر شارع فيه
الى لمسته تهصرا=يا خوي ما نيب قاويه
عليه ثويب عن العرى=جعل اريش العين يبليه
بطنه لبيب ومزعفرا=يا زين طي الحقب فيه
ابو بريم مقمرا=من فوق الاوراك زاويه
يا بو زميم مشذرا=ومزهي وجه راعيه
قم حبني لا تعذرا=والعذر مانيب باغيه

مريت بيت للمحبين مقفول=وجابتني القدرة على حد بابه
ونشدت جيرانه عسى البيت منزول=قالوا حبيبك راح لا واسفا به
وله مدة بالسوق ماشيف له زول=وبابه عليه من السوافي ترابه
وهلت دموع العين والقلب مشغول=وعند الفراق اللي حصل في غيابه
واقفيت واللي بين الاضلاع مجهول=حب درسته غيب ماهو كتابة
أهلا هلا بك ناعس الطرف مكحول=مادمت انا حي لحبل الرجا به

يا اهل الطايف عسى السيل يسقيكم=خمسة ايام على الراس عاده
خمسة ايام على فرع واديكم=يااهل الطايف عسى الخير يقتاده
عيني اللي تنثر الدمع تبكيكم=كل يوم ناقص الحال بزياده
الله اكبر كل ما حل طاريكم=ينزعج قلبي على غير معتاده
والله اني ازعج الصوت وادعيكم=وان زعجت الصوت مانيب نشاده
ما تردون النظر يم غاليكم=عادة بالخير مافيه حساده
اتمشى وانتظر في حراويكم=مانتهنا لذة النوم ورقاده