حمامة لا جزاك الله با لاحسان=ماانتيب مني بنو الخير مذكورة
ذكرتني يا حمام الورق خلاني=وادعيت لي دمعة بالخد منثورة
حس عن النوم تالي الليل قزاني=فن على الطار شاله كل غندورة
قحصت من مرقدي دهش و غرقان=قمت اتسمع لمن ها الفن في دوره
يوم ان ربي على ما راد مشاني=طاوعت شور اللعين وطف لي شوره
لقيت مثل المها يلعب بميدان=نهده صغير وخده تقل بنورة
باطراف وشم الخشوم افراد حمران=وبمفرق الراس مثل النجم مزرورة
واقفت تمايح ردوف تقل نقيان=والا طعوس بنتها الريح مامورة
لبسهن البتت وثويب سبهان=وثياب جز على الامتنان منثورة
والله دين القطع دين القطع ثاني=يا سكر الشام بين شفاك يا نورة
حور بدور عليهن صك بيبان=عنهن يدك ياقليل المال مقصورة
تكفون ياهل النضا ذربين الايمان=ما منكم اللي يسلم على نورة
يانور يانور عيني لا تباطاني=الرجل عندك ولو قفيت ماسورة
تراك تسوى الحسا والهند وعمان=مع مصر والشام والبحرين وقصوره
ياونتي يوم (هاجد) بالخبر جاني=ونة معيد على المنحاة مصخورة
كريم يابارق من رايح زان=حس الرعدفيه كنه رجف طابوره
لعل يسقي بلد حيي وحياتي=يسقي غروس النخل من وبل مامورة
لعل يسقي الطويرف غر الامزان=اشوف واديه يطمي طمية بحوره
يسقي شعيب نحبه بين ظلعان=فيه النخل شارع ما احلاه و سطوره  
احبه الصبح واحبه مسيان=والحب الاخر الى شفته بكافوره
والحب الاعظم الى شفته بالاعيان=بين الجرايد سواة الجوخ منثورة
و(الغاط) داري وابوي ودار جداني=ورث لنا من قديم الوقت وعصوره