ناح الحمام بعاليات المقاصير=واهل الهوى طربين ما يسمعونه
ذكرتني يا الورق لا ذكرك خير=غرو كما لدن المطارق قرونه
علام ما كم ضايع ياهل الحير=نبي نعدله كان ماتعدلونه
ما هي حمية ساقني نية الخير=والشرط ما نبغيه لو تشرطونه
الا ان حصل راعي النهود المزابير=هز ومز وكرعة في سنونه
باكر ضحى العيد لا طقوا الزير=ما عندهم من غالي يلبسونه
انا وخلي فرقتنا المقادير=يا من خبط بيديه واعمى عيونه
يا شاعقين النار جاكم مسايير=ضو سناها يجذب اللي يجونه
يا مال تفاق شفوق على الطير=ومحنش من بعد ذا يذكرونه
والا ف (حر) ما لوى رجله السير=بالوكر طلاب العشا يحترونه
يظهر عشيري كا لخلاصة من الكير=اعيذه برب الناس لا ينحتونه
تصبح عروق القلب عندي معاشير=ويزهر ثمر قلبي وتطرخ غصونه
يا بيه أنا لكروش لأعطي ولابيع=قبلك طلبها فيصل وابن هـادي
بيه لو كثرت بالقول ماطيع=هل كيف تبغيني أسلم جـوادي
يابيه ما يرهم على مثلهاالبيع=ولا يجي مثله يقوده مهادي
ماجمع أصله بالقراطيس تجميـع=أصله يعرفونه جميع البوادي
باغن الى من لقموا بالمصاريع=وصاح الصياح وثار عج الطــــرادي
أنهج عليها وانعدي بالتراثيع=مثل الفحل لاصار وقت الهــدادي
أصلها لعيون بيضن مفاريع=فوق الحنايا والسبايا عوادي
هذاك بيعه كان تفهم لهاالبيع=الى منهن جلبن بسوق المـــزادي
يابيه أنا لاأسمع جوابك ولا طيع=هرجك بمقلـة ناظري والفوادي
ياسابقي ما نرخصك بالماميع=حتما ولو قيل أرفعوا بالجوادي
أبغي الى ثار الدخى والزعازيع=وحطوا على عجلاتهم العــدادي
بيوما يشيب من حذاه المراضيع=حدين وحاديهن من الخوف حـــادي
أنطح وراء ربعي وجيه المداريع=وافك عليها دينهم والعبادي
وأنشد عني وعنها المفازيع=هو هرجنا ذا كذب وإلا وكــادي
حلفت ما يطري عليه لها بيع=الى الحشر ما يفخت ســواده سوادي
ما دام أنا راسي لرياح الذعاذيع=بالعون طالبها من الناس غادي
وصلوا على محمد خبر المشافيع=اللي لنا يشفع بيوم التنادي