ياجر قلبي جر لدن الغصون=وغصون سدر جره السيل جرا
واهله من اول بالورق يورقوني=على غدير تحته الما يقرا
على الذي مشيه تخط بهون=والعصر من بين الفريقين مرا
لا والله اللي بالهوى هوجروني=هجر به الحيلات عيت تسرا
لا مبعد عنهم ولا قربوني=ولا عايف منهم ولا ني مورا
واكثر عذاب القلب يوم سنحوني=بيح بصبري لو بغيت اتدرا
لا ضاق صدري قمت اباري الظعون=كني غرير بالدلوهة مضرا
وقبلي عليه اشفق وتبكي عيوني=والحال من ود الحبيب تبرا
يا عزتا لي من تفرق شطوني=يعزا لي ارمي بالسلب واتعرا
ان مت في خد بعيد انقلوني=على هدي الزمل مشيه تدرا
بين النهود وقد روس القرون=عن الهبايب مستكن مذرا
ياليتهم بالحب ماولعوني=كان ابعدوا عني بخير وشرا
والا انهم يوم إنهم قربوني=خلوني اقضي حاجتي واتدرا
وياليتهم في الدرب ما واجهوني=وياليتهم مازادوا الحر حرا
وياليتهم عن حاجتي سايلوني=يوم اني اقعد عندهم واتحرا
وياليتهم من زادهم اطعموني=انا على زاد اليتيم اتجرا
لا قربوا مني ولا بعدوني=ولا ميس منهم ولا ني مورا
الخد برق في علو المزون=تقول براق من الصيف سرا
وقفت عنده شايحات عيوني=كني غرير باللهاوي مضرا