قال الصبي البرقي تهيض بونة=في موسم (الحمة) مداهيل الاجواد
الحال ونه والعتيم اكملنه=(والجف) تومي به خفيات الأنواد
لي صاحب وادي الدواسر مغنه=وسط اللدام ومقيله ظل وبراد
من حدر الوادي لقا فيه جنة=ومن سند الوادي لقا فيه الاجواد
(فالله) (درى) عن صاحبي ويش ظنه=هو يحسب ان الحب يمحاه الابعاد
لا بد عجلات الركايب يجنه=في ساعة والناس في النوم هجاد 
الحق والمفرود ماياصلنه=يكون (حرة) يبري تعبها التجلاد
وجدي عليها وجد من هملنه=عيرات النضا لاشراب ولازاد
او وجد سرحان الي حيزنه=سحم الضرايا واصبح الصبح ماصاد
على وليف كن براق سنه=شهلول بردا خيلت عقب رعاد
قلبي عليها يقرع اقراع شنه=درهم بها الركبي مع كل وراد
شبهت خلي غرسة مستكنة=او بكرة عقرا مقاديم الاذواد
ما انساه كون الخيل تنسا الاعنة=والا الحضر والبدو ينسون الاعياد
ريحه زباد من سويقة مغنه=تلفي به الحجاج من سوق بغداد
وزميمه في سلة الخشم كنه=يشدي زهر حوذانة غب براد
شبه الغزال اللي التواصيف منه=خذيتها غصب على كل حساد
فصليت انا فرض وخليت سنة=شفق على حديث مركوز الانهاد
وخذيتها في الليل يوم احجمنه=فوق الذلول اللي زهت خرج وشداد
يوم (القيان) السود قد قرننه=شقر عكاريشه على الصدر وراد
زينتنا ربع حداد الاسنة=جمع البروق اللي على الهوش وراد