البارحة ساهر والعين مسهرها=زول مع السوق با لمفرق تعداني
من يمه النفس فيما فات قاهرها=واليوم خطر على فرقاه تقواني
ما الوم عيني ولو هلت عبايرها=من حر فرقى وليف لي تناساني
كن الرمدـ لا بلينا ـ في محاجرها=ما طبق الجفن مع هجعان الاعيان
على وليف نظيف من جواهرها=ياحيف عقب الطرب والولف ينساني
ان قلت ينظر بحالي ما يناظرها=وان قلت يرحم يزيد الهجر هجران
هو مالك الحال كاسرها وجابرها=وشفاي بشفاه وشفاه يشفاني
له عين سبحان خالقها وساطرها=سواه ربي على ما راد فرداني
وعيونها كن الاثمد في محاجرها=من غير كحل هدبهن اسود قان
واراس يضرب في ملاقي خواصرها=تنثر عليه الرشوش ارناق والوان
والريحة روضة ناجت زواهرها=يسجع بها الطير ويغرد با لالحان
يا نور بنورة ويا شمعة جزايرها=يا نقوة البيض من حضر وبدوان
فيها من الزين شارات اناظرها=حمرة وعفرة وزين اشباه والوان
يا روح روحي ويا خافي سرايرها=مهوب حق جزا الاحسان حقران
يا نور بنورة ما نيب قادرها=يوضى سناها ودونه حال بنيان
شهب اللوايح عسى نجم يحدرها=واما كفى واحد يا الله بالثاني
سقوى الى شفت والي العرش دامرها=تصير لي مطرق درب وميدان
واقول هذي ديار كيف ابنكرها=منزل حبيبي وحيانه وحياني
يا دار وين الظبا اللي فيك خابرها=ادمي .. وريمي .. وعفري ..وغزلان
منهن هنوف الى من قمت اناظرها=غضت بصرها وتسحرني بالاعيان
احير باوصافها لا جيت اناظرها=لا رنق مشخص ولا نيرة وحمران
كنه من الحور والي العرش حادرها=يا قبلة الله ويا سيدي وسلطاني
انا هليك دريك من سعايرها=وراك يا صاحبي بالنار تصلاني
علي حجة : فوردها وصدرها =باي الاسباب تنكرني وتجفاني
خف سامك العرش في نفسي واجبرها=ثم امش لي بالعدل وارفق على شاني
مانيب عاتي عن السنة ومنكرها=ولا نيب مستبدل لي مذهب ثاني
فان كان لا ذي ولا هذي نقر لها=بالصبر نصبر وصيور العمر فاني
وصلاة ربي عد ما طار طايرها=على نبي الهدى وامر بالاحسان