يا حمام على الغابة ينوح=ساجع بالطرب لا وا هنيه
فلت حيه ولا كنه بيوحي=مر عجل ولا سلم عليه
وا عسى السيل دايم ما يروح=ما يفارق جفار الصايغية
حيث ينصاه خطوات الطموح   =كل بيضا هنوف عسوجية
تنقض الراس لاجت بتروح=وتنكسه لية من فوق لية
نقضت راسها ودها تروح=قلبها مشتغل يبي خويه
يا شريفة متى ودك نروح    =يم ديرة هلك يا العسوجية
قالت اصبر يطيبن الجروح   =شهر وعشر ودنوا له مطية  
كن في ضامري قدر يفوح=او غروب توامى في ركيه
روح روحي بغت روحي تروح   =يوم قيل الغضي فيه جدرية
جيت ابشرب والى مسك يفوح  =غاسل فيه وضاح الثنية
والحجب نابي فوق السطوح   =والجدايل على متنه طويه
جعل زمل يبي خلي يروح=ينكسر في شعيب الصالحية
قلت يا ذا الحمام اللي تنوح=جارك الله عن الرامي نجيه
ذكرت صاحبي مبري الجروح   =قذلته فوق متنه هلهلية
قلت قوه ولا كنه بيوحي=صد واقفي ولا رد التحيه
قال قبلك غدا ناس ذبوحي   =وين عبدالرحيم وين حيه
الوليعي وقع في راس صوح   =طاح فوق الحصا سالت دميه