البارحة ليلي عسـى الله يعوده=يازين وصل الليل من بين الأحباب
جيت الحبيب اللي وفت لي وعوده=ماصار لى منبوز الارداف كذاب
والى مكـانه خالي من حسـوده=بدا التحية لي على هجة الباب
خليت به يوم الزواهـر شهوده=في ساعة عنا هل الشر غياب
عنده الين الصبح بانت عموده=نادى المصلي بالجماعة والاجناب
خلي على راعي الهوى وش كوده=عليه من هرج العرب ستر وحجاب
شوفه دواي وعلتي من صدوده=ودواه شوفي والمودة لها اسباب
الله يديمه لي ويبقي سعوده=والبيض عقبه لوصفن قلت مااناب
قالـوا عشيرك يا ولد وش زوده=وش نفله بالزين عن تلع الارقاب
من قولهم تو النظر به نعوده=لقيت مابه شي من الشين ينعاب
تسمعوا وصفه وهذا وجوده=ياطا بحدب منهن الروح تنذاب
والساق دملوج سقنه مدوده=في منبته ما هزعه كل هباب
وانف قسم صافي خدوده وسوده=وخرس بلا كحل مضاليل واهداب
جيده ونهده محفياته جعوده=وغـر مناظيم عذيات وعذاب
لا طول لا قصر بمشيه ركوده=لادق لا عبج مثانيه ورغاب
وتالي وصـوفه ماحصينا عدوده=للقلب نهاب وبالناس لعابا
الشف يمـه كل خيط يقـوده=ويلويه عن غيره لواليب دولاب
هني من مثلي لمثله يفوده=هذا الوكاد وكثرة الهرج ماجاب
ما دام جسمي مالجا في لحوده=ما انساه وهروجه عجاريف وعجاب
وصلاة ربي عد ما رزم رعوده=على النبي ما طقوا البدو منساب